បុរសម្នាក់រងរបួសធ្ងន់ដោយសារភ្លាត់ស្នៀតពេលដាក់រំសេវបំផ្ទុះយកថ្ម
17-May-2016 | ដោយ មែន កំសត់
ខេត្តកំពត៖បុរសម្នាក់បានរងរបួសធ្ងន់នៅត្រង់មុខ ស្ទើរមើលពុំយល់បន្ទាប់ពីគ្រាប់រំសេវផ្ទុះ ព្រោះតែភ្លាត់ស្នៀតពេលកំពុងដាក់បម្រុងបំផ្ទុះ ដើម្បីយកថ្មលក់។ ហេតុការណ៍នេះ បានកើតឡើងកាលពីវេលាម៉ោងជិត៨ព្រឹក ថ្ងៃទី១៦ ខែឧសភា ឆ្នាំ២០១៦ ស្ថិតក្នុងភូមិភ្នំខ្យង ឃុំ ប្រាសាទភ្នំខ្យង ស្រុកកំពង់ត្រាច ខេត្តកំពត។ ដោយសារការដាក់រំសេវបំផ្ទុះនោះ ជាសកម្មភាពមិនស្របផ្លូវច្បាប់ទើបក្រោយកើតហេតុភ្លាមៗ ក្រុមគ្រួសារបានប្រញាប់ប្រញាល់បញ្ជូន ជនរងគ្រោះចូលមន្ទីរពេទ្យបំណងលាក់លៀមព័ត៌មានជាមួយអាជ្ញាធរមាន សមត្ថកិច្ច។
បុរសរងគ្រោះក្នុងហេតុការណ៍នេះ ឈ្មោះសែត សួន អាយុ ៥៤ឆ្នាំ រស់នៅក្នុងភូមិ ឃុំកើតហេតុខាងលើ។
ប្រភពពីអ្នកភូមិ នៃកន្លែងកើតហេតុបានរៀបរាប់ថា ជារឿយៗនាអំឡុងពេលចុងក្រោយនេះ បុរសរងគ្រោះតែងតែលបលួចខួងថ្មភ្នំដាក់រំសេវបំផ្ទុះ ដើម្បីយកបំណែកលក់បន្ទាប់ពីផ្អាកអស់រយៈកាលយូរមកហើយ ជាមួយអ្នកភូមិដទៃទៀត ព្រោះតែការហាមឃាត់ដោយសារលេចឮអំពីអ្នកវិនិយោគម្នាក់ទទួលបាន អាជ្ញាប័ណ្ណសម្រាប់ធ្វើអាជីវកម្មលើភ្នំមួយ នោះ។ មុនពេលកើតហេតុ បុរសរងគ្រោះបានខួង និងដាក់រំសេវរួចរាល់តែចុចមិនផ្ទុះក៏ចូល ទៅក្បែរយកដែករុកឆ្កឹះទើបផ្ទុះឡើងបណ្តាលបុរសរូបនោះរងគ្រោះថ្នាក់ យ៉ាងធ្ងន់ធ្ងរតែម្តង។ ប្រភពដដែលបានបញ្ជាក់ទៀតថាដោយមិនបង្អន់យូរ ក្រុមគ្រួសារក៏បញ្ជូនជនរងគ្រោះទៅ មន្ទីរពេទ្យក្នុងស្ថានភាពបន្ទាន់បំផុត៕
ចំនួនអ្នកទស្សនា
- ថ្ងៃនេះ9641
- ម្សិលមិញ20231
- សប្តាហ៍នេះ88721
- ខែនេះ110601
- ឆ្នាំនេះ110601
- សរុប20553057